Thursday, November 13, 2014
សន្និសីទថ្នាក់ជាតិប្រចាំឆ្នាំលើកទី៣ស្ដីពី “ដំណើរឆ្ពោះទៅរកភាពជោគជ័យក្នុងអាហារូបករណ៍”
តើអ្នកដឹងពីដំណឹងសន្និសីទថ្នាក់ជាតិលើកទី៣ស្ដីពីអាហារូបករណ៍ដែររឺទេ? នៅសៅរ៍ទី១៥ ខែវិច្ឆិកា ខាងមុខនេះ នឹងមានសន្និសីទថ្នាក់ជាតិលើកទី៣ស្ដីពីការចាប់យកអាហារូបករណ៍ទៅសិក្សានៅបរទេសមួយដែលនឹងរៀបចំឡើងនៅវិទ្យាស្ថានជាតិអប់រំ ដោយក្រុមហ៊ុនANUSSA Event Planner។
អ្នកនាំពាក្យនៃក្រុមហ៊ុនANUSSA Event Plannerបានបញ្ជាក់ប្រាប់ថាសន្និសីទថ្នាក់ជាតិនេះត្រូវបានរៀបចំពីរដងរួចមកហើយកាលពីឆ្នាំ២០១២ និង ២០១៣ ហើយនេះជាលើកទី៣ហើយដែលសន្និសីទនេះនឹងត្រូវរៀបចំឡើងក្រោមការផ្ដល់កិត្តិយសអញ្ជើញចូលរួមពីតំណាងស្ថានទូតធំៗ និងស្ថាប័នផ្ដល់អាហារូបករណ៍ជិត១០ ដែលផ្ដល់អាហារូបករណ៍រាប់ពាន់កន្លែងមកយុវជនកម្ពុជាដូចជា ស្ថានទូតអាមេរិក ជប៉ុន អូស្រ្តាលី កូរ៉េ អង់គ្លេស សហភាពអ៊ឺរ៉ុបជាដើម។
គោលបំណងសំខាន់នៃសន្និសីទថ្នាក់ជាតិលើកទីបីក្នុងឆ្នាំនេះគឺចូលរួមចំណែកក្នុងការជំរុញទឹកចិត្តយុវជនខ្មែរឲ្យខ្នះខ្នែងស្វែងរកអាហារូបករណ៍ទៅសិក្សានៅបរទេសដើម្បីពង្រឹងនូវសមត្ថភាព ចំនេះ និងជំនាញរបស់ខ្លួន។ ដើម្បីឲ្យការជំរុញនេះមានប្រសិទ្ធភាព សន្និសីទនេះនឹងនាំមកនូវគន្លឹះ និងគោលការណ៍ពិសេសជាច្រើនសម្រាប់ការបំពេញ និងដាក់ពាក្យស្នើរសុំអាហារូបករណ៍ បទសម្ភាស៍ និងភាពជោគជ័យផ្ទាល់ខ្លួនផ្សេងៗទៀត។ សន្និសីទនេះនឹងក្លាយជាស្ពានមួយដែលភ្ជាប់ទំនាក់ទំនងរវាងស្ថាប័នអាហារូបករណ៍ និស្សិតដែលធ្លាប់ទទួលបានអាហារូបករណ៍ ទៅសិស្សនិស្សិតដែលកំពុងស្វះស្វែងរកចាប់ឱកាសអាហារូបរកណ៍។
Final khmerFinal
បន្ថែមលើនេះទៀត សន្និសីទស្ដីពី “ដំណើរឆ្ពោះទៅរកភាពជោគជ័យនៃអាហារូបករណ៍” នេះនឹងក្លាយជាផ្នែកមួយដែលចូលរួមរុញច្រានឲ្យមានការចូលរួមពីគ្រប់ស្ថាប័នរដ្ឋ ឯកជន និងអង្គការនានាក្នុងការអភិវឌ្ឍសមត្ថភាព និងធនធានយុវជនកម្ពុជា ជាពិសេសក្នុងវិស័យអប់រំ។
សន្និសីទលើកទីបីនឹងបង្ហាញនូវសក្ដានុពលនៃឱកាសដ៏មានតម្លៃដែលសិស្សនិស្សិតខ្មែរមិនគួរមើលរំលង ដើម្បីបន្ដនូវការសិក្សាក្រេបយកនូវចំណេះដឹងឲ្យបានខ្ពង់ខ្ពស់ និងដើម្បីជាប្រយោជន៍ជាតិផងដែរ។
គួរបញ្ជាក់ផងដែរថាសន្និសីទថ្នាក់ជាតិលើកទី៣ស្ដីពី “ដំណើរឆ្ពោះទៅរកភាពជោគជ័យនៃអាហារូបករណ៍” អាចដំណើរការទៅបានក្រោមការឧបត្ថម្ភធំដោយក្រុមហ៊ុនថ្នាំពណ៌ជាតិ ឧបត្ថម្ភដោយ ស្រ្ពីងបត ហ្វរខេមបូឌា រោងកុនភ្លេតទីនាម ទឹកបរិសុទ្ធវីតាល ក្រុមហ៊ុនភេសជ្ជៈកូកាកូឡា ក្រុមហ៊ុនភេសជ្ជៈព្រន់ ថ្នាំកូសីល សហការឧបត្ថម្ភដោយ ក្រុមហ៊ុនSabay សាលាយូស៊ីម៉ាស ក្រុមហ៊ុនខនហ្វើរែល និងដៃគូរផ្សព្វផ្សាយ គេហទំព័រថ្មីថ្មី ទស្សនាវដ្ដីយូសថែម និងហេលថែម។
ព័ត៌មានបន្ថែមសូមទាក់ទងលេខទូរសព្ទ ០១០ ៩១១ ៧៧៦ រឺ ០៧៧ ៨៥ ០២ ៧២។
Subscribe to:
Post Comments (Atom)
0 comments:
Post a Comment